ഉയർപ്പിൻറെ രഹസ്യം

യേശുവിൻറെ ഉയർപ്പുമായി നമുക്കുണ്ടാകേണ്ടുന്ന താതാത്മ്യം

മരണത്തോടും അടക്കത്തോടും ഉയർപ്പിനോടും നമുക്ക് ഓരോരുത്തരും എങ്ങനെ താത്മ്യം പ്രാപിക്കാനാകും എന്നതാണ് ഉയർപ്പിൻറെ ഏറ്റവും വലിയ സന്ദേശം.

നമ്മിൽ ആത്മാവിൻറെ ജീവൻ സജീവമല്ലാത്ത ഒരു മരണം അതിക്രമങ്ങളാൽ മുന്നമേ വ്യാപാരിച്ചിരുന്നു. രണ്ടാമത് സംഭവിക്കേണ്ട മരണം ജഡത്തിൽ നന്മതിന്മകളെ പ്രവർത്തിച്ചുകൊണ്ട് ദൈവപ്രസാദം നേടാമെന്നുള്ള വ്യർഥമായ വ്യാമോഹത്തെ മരിപ്പിക്കുന്നതാണ്. ഈ മരണം നമ്മുടെ ഭാഗത്തുനിന്നുള്ള പരിശ്രമത്താലോ അദ്ധ്വാനത്താലോ ഉണ്ടാകേണ്ടുന്ന ഒന്നല്ല. യേശുവിൻറെ പുനരുദ്ധ്വാനത്തോട് ഏകീഭവിക്കാനായുള്ള വാഞ്ച ഉണ്ടാകുമ്പോൾ ദൈവാത്മാവുതന്നെ മരണത്തോടുള്ള ഏകീഭാവവും ഉയർപ്പിനോടുള്ള ഏകീഭാവവും നൽകാനായുള്ള അടക്കത്തിൻറെ നിശ്ചലാവസ്ഥ നമ്മയിൽ സജ്ജമാക്കും.

ഈ നിശ്ചലാവസ്ഥയെ ആണ് സ്നാനം എന്ന വാക്കുകൊണ്ട് ഉദ്ദേശിക്കുന്നത്, അതും നമ്മുടെ ഒരു പ്രവർത്തിയല്ല. ആരും പ്രശംസിക്കാതിരിപ്പാൻ ആരുടെയും പ്രവൃത്തി കാരണമല്ല ദൈവത്തിന്റെ ദാനമത്രേ എന്ന് വരേണ്ടതിന് സകലതും ദൈവാത്മാവിൻറെ കൃപയാൽ സംഭവിക്കുന്നു.

അങ്ങനെയെങ്കിൽ ഒരു വ്യക്തിക്ക് എങ്ങനെ ഈ മരണത്തിലും അടക്കത്തിലും ഉയർപ്പിലും പങ്കാളിയായികൊണ്ട് അത് ആസ്വദിക്കാനും അനുഭവിക്കാനും സാധിക്കും?

ക്രിസ്തു ജഡത്തിൽ കഷ്ടമനുഭവിച്ചതുകൊണ്ടു നിങ്ങളും ആ ഭാവം തന്നേ ആയുധമായി ധരിപ്പിൻ. ജഡത്തിൽ കഷ്ടമനുഭവിച്ചവൻ ജഡത്തിൽ ശേഷിച്ചിരിക്കും കാലം ഇനി മനുഷ്യരുടെ മോഹങ്ങൾക്കല്ല, ദൈവത്തിന്റെ ഇഷ്ടത്തിന്നത്രേ ജീവിക്കേണ്ടതിന്നു പാപം വിട്ടൊഴിഞ്ഞിരിക്കുന്നു. അവർ ജഡസംബന്ധമായി മനുഷ്യരെപ്പോലെ വിധിക്കപ്പെടുകയും ആത്മാവുസംബന്ധമായി ദൈവത്തിന്നൊത്തവണ്ണം ജീവിക്കയും ചെയ്യേണ്ടതിന്നു തന്നേ – 1 പത്രൊസ്  4:1,2,6

ക്രിസ്തുവിൻറെ ജഡത്തിലെ കഷ്ടാനുഭവം എന്നത് കേവലം ഭൗതീക കഷ്ടപ്പാടുകൾ അല്ല, സ്വയവും മറ്റുള്ളവർക്കുവേണ്ടിയും ആത്മാവിലെ ജീവിതത്തിനായി അനുഭവിച്ച വ്യഥകൾ ആണ്. അതിനാൽ ആത്മാവിലെ ജീവിതം നയിക്കാനായി നിങ്ങളും ക്രിസ്‌തുവിന്റെ അതെ ഭാവം അനുവർത്തിച്ചുകൊണ്ട് സാധാരണ മനുഷ്യർ ചെയ്യുന്നപോലെയുള്ള മതാചാരങ്ങൾ വിട്ട് ദൈവത്തിന്റെ ഇഷ്ടത്തിനനുസൃതമായി ജീവിക്കണം എന്നതാണ് ആഹ്വാനം. മനുഷ്യരെ പ്രസാദിപ്പിക്കേണ്ട ആവശ്യമില്ല എന്നാൽ എല്ലാപേർക്കും എപ്പോഴും നന്മചെയ്ക എന്നതാണ് ദൈവേഷ്ടത്തിൽ മുഖ്യമായത്. പ്രതിഫലേച്ഛയില്ലാതെ മറ്റുള്ളവർക്ക് നന്മചെയ്യുമ്പോൾ പ്രതിഫലം നൽകുന്നത് ദൈവമായിരിക്കും.

ദൈവാത്മാവിൻറെ നിയോഗത്തിനനുസരിച്ച് മുന്നോട്ടുപോകുമ്പോൾ നന്മകൾ മാനുഷികസഹതാപത്തിൽ ആയിരിക്കില്ല ചെയ്യുന്നത്. അതിനാൽ പലപ്പോഴും ദൈവാത്മാവിൻറെ നടത്തിപ്പനുസരിച്ച് നന്മചെയ്യുന്നവരുടെ ഉദ്ദേശശുദ്ധി കേവലം മനുഷ്യർക്ക് മനസിലാകില്ല എന്നുള്ളതുകൊണ്ട് മതമനുഷ്യർ യേശുവിനെ വിധിച്ചതുപോലെ തിന്മയാൽ വിധിച്ചേക്കാം!

സ്നാനത്തിൽ നിങ്ങൾ അവനോടുകൂടെ അടക്കപ്പെടുകയും അവനെ മരിച്ചവരുടെ ഇടയിൽനിന്നു ഉയിർത്തെഴുന്നേല്പിച്ച ദൈവത്തിന്റെ വ്യാപാരശക്തിയിലുള്ള വിശ്വാസത്താൽ അവനോടുകൂടെ നിങ്ങളും ഉയിർത്തെഴുന്നേൽക്കയും ചെയ്തു.
അതിക്രമങ്ങളിലും നിങ്ങളുടെ ജഡത്തിന്റെ അഗ്രചർമ്മത്തിലും മരിച്ചവരായിരുന്ന നിങ്ങളെയും അവൻ, അവനോടുകൂടെ ജീവിപ്പിച്ചു; അതിക്രമങ്ങൾ ഒക്കെയും നമ്മോടു ക്ഷമിച്ചു ചട്ടങ്ങളാൽ നമുക്കു വിരോധവും പ്രതികൂലവുമായിരുന്ന കയ്യെഴുത്തു മായിച്ചു ക്രൂശിൽ തറെച്ചു നടുവിൽനിന്നു നീക്കിക്കളഞ്ഞു; വാഴ്ചകളെയും അധികാരങ്ങളെയും ആയുധവർഗ്ഗം വെപ്പിച്ചു ക്രൂശിൽ അവരുടെമേൽ ജയോത്സവം കൊണ്ടാടി അവരെ പരസ്യമായ കാഴ്ചയാക്കി – കൊലൊസ്സ്യർ 2:12-15

ഇപ്പോൾ ശരിയായ ദൈവവചനത്തെക്കുറിച്ചുള്ള ജ്ഞാനത്തിൻറെ സ്നാനത്തിൽ നിങ്ങൾ യേശുവിനോടുകൂടെ അടക്കപ്പെടുകയും യേശുവിനെ മരിച്ചവരുടെ ഇടയിൽനിന്നു ഉയിർത്തെഴുന്നേല്പിച്ച ദൈവത്തിന്റെ നമ്മിലെ ജീവാത്മാവിൻറെ വ്യാപാരശക്തിയിലുള്ള വിശ്വാസത്താൽ യേശുവിനോടുകൂടെ നിങ്ങളും ഉയിർത്തെഴുന്നേൽക്കയും ചെയ്തു എന്ന വസ്തുത ഓരോരുത്തരും അറിയണം. ഇത് നിങ്ങളുടെ പ്രവർത്തിയല്ല, ദൈവം തന്നെ കൃപയാൽ നിങ്ങളിൽ ചെയ്യുന്ന കാര്യമാണ്.

ദൈവം ഭൂമിയിൽ വച്ചിരുന്ന ക്രമം നന്മയെയും തിന്മയെയും അനുസരിച്ചു ജീവിക്കുന്ന രീതിയല്ല, എന്നാൽ മനുഷ്യൻ ആ ജീവിത ശൈലി തിരഞ്ഞെടുത്തു. എന്നാൽ ഇത്തരത്തിൽ ക്രമം തെറ്റിയ ജീവിതരീതിയെ തിരഞ്ഞെടുത്തു അതിൽ ജീവിച്ച മനുഷ്യരോട് ആ അതിക്രമങ്ങൾ ഒക്കെയും ക്ഷമിച്ചു. മാത്രവുമല്ല മോശയിലൂടെയും മതത്തിലൂടെയും നൽകപ്പെട്ട കല്പനകളായ ചട്ടങ്ങളാൽ അനുഷ്ടിച്ചു നിവർത്തിക്കാൻ സാധിക്കാതെ നമുക്കു വിരോധവും പ്രതികൂലവുമായിരുന്ന ആ കല്പനകളായ കയ്യെഴുത്തു യേശു മായിച്ചുകളഞ്ഞു. ഇനി ന്യായപ്രമാണത്തിന് നമ്മുടെ മേൽ അധികാരമോ സ്വാധീനമോ ഇല്ലാത്തരീതിയ്ൽ യേശു അതിനെ തൻറെ ക്രൂശിൽ തറെച്ചു ന്യായപ്രമാണത്തെ നമ്മുടെയും ദൈവത്തിന്റെയും നടുവിൽനിന്നു നീക്കിക്കളഞ്ഞു. അതുമാത്രമല്ല ഈ കല്പനകളും ആചാരാനുഷ്ടാനങ്ങളും ഉത്സവങ്ങളും കൊണ്ട് ജനങ്ങളെ അന്നയോളം ദൈവത്തിൻറെ പേരുപറഞ്ഞു അധികാരത്തിൽ വാഴ്ചനടത്തിയിരുന്ന സകല മതത്തിൻറെ വാഴ്ചകളെയും അധികാരങ്ങളെയും തൻറെയും ജനങ്ങളുടെയും മുന്നിൽ ആയുധവർഗ്ഗം വെപ്പിച്ചു (അധികാരം ഇല്ലാത്തവരാക്കി). നന്മയുടെയും തിന്മയുടെയും മരക്രൂശിൽ നിരായുധരായ മതഅധികാരികളുടെ മുന്നിൽ യേശു ജയോത്സവം കൊണ്ടാടി അവരെ പരസ്യമായ കാഴ്ചയാക്കി തീർത്തുകളഞ്ഞു.

ഇപ്പോഴോ, നമ്മെ പിടിച്ചടക്കിയിരുന്ന ന്യായപ്രമാണം സംബന്ധിച്ചു മരിച്ചിരിക്കകൊണ്ടു അക്ഷരത്തിന്റെ പഴക്കത്തിലല്ല ആത്മാവിന്റെ പുതുക്കത്തിൽ തന്നേ സേവിക്കേണ്ടതിന്നു നാം ന്യായപ്രമാണത്തിൽ നിന്നു ഒഴിവുള്ളവരായിരിക്കുന്നു – റോമർ 7:6

ക്രിസ്തീയമതത്തിന് യേശു ചെയ്തത് എന്താണെന്ന് രണ്ടായിരം വർഷം കഴിഞ്ഞിട്ടും മനസിലായിട്ടില്ല, ഇനി മനസിലാക്കാനും പോകുന്നില്ല. അതിനാൽ നിങ്ങൾ ഇത് മനസിലാക്കുക – യേശുവിനൊപ്പമുള്ള നമ്മുടെ മരണവും അടക്കവും ഉയർപ്പും സത്യമാണെങ്കിൽ, ഇപ്പോൾ നമ്മെ പിടിച്ചടക്കിയിരുന്ന ന്യായപ്രമാണത്തിനും മതവ്യവസ്ഥക്കും നാം മരിച്ചവരാണെന്നും, അതിനാൽ അതിൽ ഇനി ജീവിക്കാതെ പ്രതികരിക്കാതെ നിർജ്ജീവ അവസ്ഥയിൽ ആയിരിക്കും എന്ന് തീരുമാനിക്കണം. മാത്രമല്ല ഇനി കല്പനകളുടെയും തിരുവെഴുത്തുകളുടെയും അക്ഷരത്തിന്റെ പഴക്കത്തിലല്ല ദൈവത്തിൽ നിന്നും നേരിട്ടുള്ള ആത്മാവിന്റെ പുതുക്കത്തിൽ തന്നേ മുന്നോട്ട് ജീവിക്കേണ്ടതിന് നാം ന്യായപ്രമാണത്തിൽനിന്നു ഒഴിവുള്ളവരായിരിക്കുന്നു എന്ന സത്യം മനസിലാക്കണം. ഇനി എഴുതപ്പെട്ടത് നോക്കിനോക്കിയല്ല ജീവിക്കേണ്ടത് എന്ന് സാരം!

അതുകൊണ്ടു ഭക്ഷണപാനങ്ങൾ സംബന്ധിച്ചോ പെരുനാൾ വാവു ശബ്ബത്ത് എന്നീകാര്യത്തിലോ ആരും നിങ്ങളെ വിധിക്കരുതു. നിങ്ങൾ ക്രിസ്തുവിനോടുകൂടെ ലോകത്തിന്റെ ആദ്യപാഠങ്ങൾ സംബന്ധിച്ചു മരിച്ചു എങ്കിൽ ലോകത്തിൽ ജീവിക്കുന്നവരെപ്പോലെ മാനുഷകല്പനകൾക്കും ഉപദേശങ്ങൾക്കും അനുസരണമായി: പിടിക്കരുതു, രുചിക്കരുതു, തൊടരുതു എന്നുള്ള ചട്ടങ്ങൾക്കു കീഴ്പെടുന്നതു എന്തു? – കൊലൊസ്സ്യർ 2:18,20,21

ഇതൊക്കെ നമ്മുടെ പ്രവർത്തിയോ അറിവോ ഇല്ലാതെ തന്നെ ദൈവം നമുക്ക് ചെയ്തു തന്നു എങ്കിൽ, ഇനി മതത്തിൻറെ കല്പനകളിൽ ഭക്ഷണപാനങ്ങൾ സംബന്ധിച്ചോ പെരുനാൾ സംബന്ധിച്ചോ ശബ്ബത്ത് സംബന്ധിച്ചോ തുടങ്ങിയ ഒന്നിലും ആരെയും നിങ്ങളെ ഭരിക്കാനോ ചോദ്യം ചെയ്യാനോ അനുവദിക്കരുത്.

ഇനി നിങ്ങൾ ക്രിസ്തു ചെയ്തതുപോലെ ന്യായപ്രമാണത്തിനും മതത്തിനും നിങ്ങൾ നിർജ്ജീവ അവസ്ഥയിൽ ആണെന്നുള്ള ബോധം ഉണ്ടാകണം.ആ ബോധം ഉണ്ടായാൽ നിങ്ങൾ ഇനി മതാനുഷ്ഠനികളായ കേവലം മനുഷ്യരെപ്പോലെ മതത്തിലെ മാനുഷകല്പനകൾക്കും ഉപദേശങ്ങൾക്കും അനുസരണമായി ചെയ്യരുത്, പിടിക്കരുതു, രുചിക്കരുതു, തൊടരുതു എന്നുള്ള ചട്ടങ്ങൾക്ക് വീണ്ടും കീഴ്പെടാൻ പാടില്ല. ആ മതത്തിൻറെയും കല്പനകളുടെയും അടിമത്വത്തിൽ വീണ്ടും കുടിങ്ങിപ്പോകരുത്.

യേശുവിനെ മരിച്ചവരിൽനിന്നു ഉയിർപ്പിച്ചവന്റെ ആത്മാവു നിങ്ങളിൽ വസിക്കുന്നു എങ്കിൽ ക്രിസ്തുയേശുവിനെ മരണത്തിൽനിന്നു ഉയിർപ്പിച്ചവൻ നിങ്ങളിൽ വസിക്കുന്ന തന്റെ ആത്മാവിനെക്കൊണ്ടു നിങ്ങളുടെ മർത്യശരീരങ്ങളെയും ജീവിപ്പിക്കും – റോമർ 8:11

യേശുവിനെ മരണത്തിൽ നിന്നല്ല മരിച്ചവരിൽ നിന്നു ഉയിർപ്പിച്ചവന്റെ ആത്മാവു നിങ്ങളിൽ വസിക്കുന്നുണ്ടോ? യേശു ശരീരത്തിൽ മരിച്ചില്ല, എന്നാൽ മരിച്ചവരുടെ ഇടയിൽ നിന്നും ആണ് യേശുവിനെ ദൈവാത്മാവ് ഉയർപ്പിച്ചത്. യേശുവിൻറെ ഉള്ളിൽ വസിച്ചിരുന്ന ദൈവാത്മാവായ ജീവാത്മാവ് അഥവാ പരിശുദ്ധാത്മാവ് നിങ്ങളിൽ ഉണ്ടോ, അല്ലങ്കിൽ ഉണ്ടെന്നുള്ള അറിവുണ്ടോ??

ദൈവാംശമായ ആ ജീവാത്മാവ് നിങ്ങളിൽ സജ്ജമാണെങ്കിൽ, സജ്ജമാണെന്ന തിരിച്ചറിവ് നിങ്ങൾക്ക് ഉണ്ടെങ്കിൽ, ക്രിസ്തുയേശുവിനെ മരണത്തിൽ നിന്നു ഉയിർപ്പിച്ചവൻ ആ നിങ്ങളിൽ വസിക്കുന്ന ദൈവത്തിൻറെ ജീവാത്മാവിനാൽ നിങ്ങളുടെ മർത്യശരീരങ്ങളെയും മരിക്കാതെ ജീവിപ്പിക്കും. ഇതാണ് നിങ്ങളിൽ സംഭവിക്കേണ്ട ഉയർപ്പ്!!